Қазақ бейнелеу өнерінің дарабозы Ә. Қастеев

2024 жылдың 26 ақпан күні кітапханамызда Қазақстанның халық суретшісі Әбілхан Қастеевтің 120 жылдығына арналған ақпараттық сағат өтті. Қазақ бейнелеу өнерінің дарабозы Ә. Қастеев тақырыбында жазылған әдебиеттер, мақалалар мен бірқатар суреттері қойылған көрме ұйымдастырылды. Ақпараттық сағат барысында тікелей қыл қалам шеберінің музейіне барып, өз көзімен көрген дүниелермен бөліскен — кітап қорын толықтыру, өңдеу және каталогтарды ұйымдастыру бөлімінің қызметкері Шолпан Сейтова  дайындаған бейнематериалын көрсетіп, ондағы зағип және нашар көретін жандарға жасалған жағдайлар жайын сөз етті. Соңғы жылдары іске қосылған мұражайдағы өнер нысандарының аудио сипаттамасы – «аудиодескрипция» жобасы жұмыс істейтіні, оның көмегімен көз жанарынан айрылған жандардың экпонаттарды танып, білу үшін үлкен мүмкіндік бар екендігі, сонымен қатар, мұражайға келген зағип жан ғимараттың барлық 8 залының сипаттамасын беретін аудиогидті пайдалана алатындығы жайындағы жағымды жаңалықпен бөлісті.

Одан басқа Шолпан Дүйсенбекқызы мұражайдағы суреттер мен экспонаттарды суретке түсіріп, оларды рамаға салып, көрме жасақтап, оқырмандарға осы сапар барысында түсірілген бейнероликті көрсетті.

Алматы қаласындағы Ә. Қастеев атындағы мемлекеттік өнер музейі және Ә. Қастеевтің музей-үйі туралы мағлұматтар берілді. Сонымен қатар, суретшінің өмірі туралы тың деректер айтылып, еңбектеріне қысқаша шолу жасалды. Іс-шараға кітапхана оқырмандары мен қызметкерлері қатысты.

Ә. Қастеевтің шығармаларын үздіксіз насихаттау қазіргі ұрпақтың, қазіргі өнер сүйер қауымның міндеті деп санаймыз.