Нүктелі-бедерлі қаріптегі Ақберен Елгезектің «Болмаған балалық шақ» кітабының тұсаукесері

2024 жылдың 30-шы қаңтар күні Зағип және нашар көретін азаматтарға арналған республикалық кітапханасы ақын, Қазақстан Жазушылар одағының және Ресей жазушылар одағының мүшесі Ақберен Елгезектің қатысуымен «Болмаған балалық шақ» атты нүктелі-бедерлі қаріптегі кітабының тұсаукесерін өткізді.
Шараның негізгі мақсаты – жаңа ғасырдың жаңашыл ақыны Ақберен Елгезектің шығармашылығымен оқырмандарды таныстыру, жас кітапханашылардың мамандыққа деген сүйіспеншілігін арттыру; еліміздегі зағип жандарға арналған нүктелі-бедерлі қаріптегі жаңа басылымдарды барынша қолжетімді ету.
«Болмаған балалық шақ» повесі әлеуметтік желілер арқылы кеңінен тарап, XXI ғасырдағы үздік 20 прозалық туынды тізіме енген қазақ интернет бестселлеріне айналған бірегей шығарма. Шығарма кітап болып басылып шықпай-ақ, жекелеген мектеп бағдарламаларына еніп, бүгінгі күнге дейін оқытылып келеді.
Шараға №4 арнайы мектеп-интернатының оқушылары қатысып, жазушыға сұрақтар қойып, өз өнерлерін көрсетіп белсенділік танытты. Сондай-ақ, Қазақ соқырлар қоғамының мүшелері мен кітапхана қызметкерлері қатысты. Оқырмандар қаламгердің өміріне байланысты, кітап жайында сұрақтар қойып, қанағаттанарлық жауап алды.

Кітапхананың баспасөз қызметі