«ЗНКААРК» РММ қызметкерлері Алматы қаласы Білім басқармасының №4 арнайы мектеп-интернатында…

Кітапхана қызметкерлері Алматы қаласы білім басқармасының «№4 арнайы мектеп-интернатында» бірқатар шаралар өткізіп қайтты.
Рухани-патриоттық сағат

Халық қаһарманы Рақымжан Қошқарбаевтың 100 жылдығына арналған «Рейхстаг жолында…- Путь к Рейхстагу» атты рухани-патриоттық сағатын «ЗНКААРК» РММ кітапхана ісін дамыту, библиография және тифлология бөлімінің қызметкерлері өткізді.
Шара мақсаты: жас ұрпақтың патриоттық сезімін қалыптастыруға ықпал ету, еліміздің тарихын, бейбітшілік үшін күрескен батырларымыздың, халқымыздың ерлігін, бірлігін насихаттау.
Рухани-патриоттық сағат оқушылармен бірге ҚР Әнұранын шырқаумен басталды. Шара барысында оқушыларға Ұлы Отан соғысы туралы, халық қаһарманы Рақымжан Қошқарбаевтың өмірбаяны, ерлігі туралы ақпарат беріліп, «Катюша» әні қатысушылармен бірге шырқалды. Қазақ және орыс тілдерінде халық қаһарманы Рақымжан Қошқарбаевқа арналған өлеңдер оқылды. Соңынан Ұлы Отан соғысында қаза тапқан азаматтарды 1 минут еске алу сәті болды.

Ел президенті Қасым-Жомарт Тоқаевтың «Егемен Қазақстан» газетінде жарияланған сұхбаты
2024 жылы 24 қаңтар күні «ЗНКААРК» РММ кітапхана ісін дамыту, библиография және тифлология бөлімінің қызметкерлері Алматы қаласы білім басқармасының «№4 арнайы мектеп-интернатында» ел президенті Қасым-Жомарт Тоқаевтың 3 қаңтарда «Егемен Қазақстан» газетіне берген сұхбатына қатысты іс-шара өткізді.
Шара мақсаты: Ел Президенті Қасым-Жомарт Тоқаев айтқан, қамтыған барлық мәселелерді жария ету. Президенттің айтқанының барлығы: Қазақстанның ішкі және сыртқы саясаты туралы. «ЗНКААРК» РММ қызметкерлері ақпарат беру барысында ел Президентінің Қазақстанның ішкі және сыртқы саясаты, елдің әлеуметтік-экономикалық дамуы, отбасылық-тұрмыстық зорлық-зомбылық, АЭС құрылысы, сондай-ақ 2022 жылғы қаңтар оқиғасы және басқа да өзекті тақырыптар туралы айтқан барлық мәселелеріне тоқталды. Кітапхананың Сөйлейтін және брайль кітаптарын шығару бөлімінде нүктелі-бедерлі қаріппен қазақ және орыс тілдерінде басылған «Егемен Қазақстан» газетінде жарияланған Президент сұхбаты, сондай-ақ аудио дискідегі нұсқасы мектепке ұсынылды. Ұстаздар кітапхана қызметкерлеріне өз ризашылықтарын білдірді.

Иллюстрацияланған кітаптардың тұсаукесері

2024 жылы 24 қаңтар күні «ЗНКААРК» РММ кітапхана ісін дамыту, библиография және тифлология бөлімінің қызметкерлері №4 арнайы мектеп-интернатта кітапхана қорына келіп түскен иллюстрацияланған кітап жиынтытықтарының тұсаукесерін өткізді.
Шара мақсаты: жас ұрпақты кітап оқуға деген қызығушылық пен сүйіспеншілікке тәрбиелеу, қоршаған орта туралы танымдылық білімдерін арттыру, дамыту, кітапхана қорындағы ерекше кітаптарды насихаттау. Нашар көретін балаларға арналған бұл дамытушылық жиынтықтар кітапханаға «Ұлы Жібек Жолымен – 2023» атты Қазақстандық халықаралық кітап және полиграфия көрмесі аясында Ресей кітап кеңесінен сыйға берілген. Мектеп оқушылары мен ұстаздарына таныстырылған кітап жиынтықтары: 1 «Приключения Мюнхгаузена». Жиынтықта екі кітап, оқиға желісіне қатысты қызықты тапсырмалары бар карточкалар және де оларды оқитын электронды құрылғы «сиқырлы қарындаш» бар. Екінші жиынтық: «Мир вокруг нас». Ол жиынтықта «Антонимы», «Насекомые» атты екі жақты оқылатын кітаптар, тапсырмалар, электронды құрылғысы бар. Оқушылар таныстырылған кітаптарды қызыға қарап, «сиқырлы қарындаш» арқылы мәтіндері мен суреттерін оқып, тифлокомментарилерді тыңдады.

Зарина Шамшиева,
                                                                                      Кітапхана ісін дамыту, библиография және                                                                                 тифлология бөлімінің библиографы