Бабаларым аңсаған Тәуелсіздік!

Бабаларым аңсаған Тәуелсіздік!
Желтоқсан айының 14-ші жұлдызында Н.Островский атындағы Қазақ соқырлар қоғамы мәдениет үйінде Зағип және нашар көретін азаматтарға арналған республикалық кітапхана «Бабаларым аңсаған Тәуелсіздік!» атты мерекелік іс-шара ұйымдастырды.
Әдеби-сазды кештің мақсаты: Тәуелсіздік күні әр қазақстандық үшін ең маңызды мереке саналады. Мереке арқылы Отанымызға деген ыстық лебіз, мақтаныш және патриоттық сезімдер ояту, азат елде тату-тәтті өмір сүріп жатқан халықтар мен ұлыстар бірлігін және кейінгі ұрпақ үшін егеменді елді сақтап қалуды ұлықтау.
Мерекелік шараның шымылдығын «Жылы ұя» оңалту орталығының домбырашылар ансамблі Құрманғазының күмбірлеген «Балбырауын» мен Дәулеткерейдің «Түрікмен» күйлерімен ашты.
Іс-шарада кітапхана директоры Байұзақов Асхат Құсайынұлы келген қонақтарды еліміздің басты мерекесі Қазақстан Республикасының Тәуелсіздік күнімен құттықтады.
Айтулы мереке концертке ұласты. Сахна төрінде Қазақстан, Отан туралы ғажап сезімге толы керемет әндер шырқалды. Жылы ұя оңалту орталығының ардагерлерінен құралған «Соловьи Алатау» хорының әншілері «Отан», «Казахстанская земля», «Қазақстан қыран далам», «Атамекен», «Моя Алма Ата» атты әндерді, кітапхана қызметкерлері Баймуратова Нурия мен Момбекова Назым «Бақытты әйел», «В небе беркут», «Қазақстаным Ұлы Отаным-ай» әндерін орындаса, кітапхана қызметкері Муханова Торғын мерекеге Әлібек Шегебайдың «Қабірден хат», Абдурахманова Жадыра Күләш Ахметованың «Сүюге шақырамын», Алматы қаласы Білім басқармасының «№4 арнайы мектеп-интернатының» оқушысы Болатқанқызы Әдемі Ұлықбек Есдәулеттің «Қазақия» атты өлең-жырларын тарту етіп, қонақтарға туған елге деген сүйіспеншілік сезім, ұлтжандылық рух пен мерекелік көңіл сыйлап, ерекше әсерге бөледі.
Шараға 51 адам қатысты.
Назым Момбекова, өнер және спорт әдебиеттері бөлімінің қызметкері