Күзгі бал 2023

Күзгі бал

Ағымдағы жылдың қараша айының 17-ші жұлдызында Зағип және нашар көретін азаматтарға арналған республикалық кітапхана және Қазақ соқырлар қоғамы «Жылы ұя» оңалту орталығының ұйымдастыруымен   оқырмандардың сұрауы бойынша алғаш рет, жоспардан тыс «Күзгі бал – 2023» байқауы  өтті. Жастар қуана күткен игілікті іс-шарада Н.Островский атындағы Қазақ соқырлар қоғамы мәдениет үйі қонақтарға лық толды.

Аталмыш байқаудың  мақсаты: Қазақ зағиптар қоғамының мүшелеріне, оның ішінде, жастарға  қуанышты көңіл-күй сыйлау мен шығармашылық  қабілеттерін қалыптастыру, эстетикалық жұмыс істей білу секілді ізгі қарым-қабілеттерін арттыру, кітап оқуға тарту.

Күзгі бал кешінде «Күз ханзадасы» мен «Күз ханшайымын» анықтау үшін зағип жастар өзара сайысқа түсті. Кітапхана қызметкерлері Баймуратова Нурия мен Момбекова Назым байқауды жүргізіп, арасында сәнді де көркем костюм киген өнерпаз жастарға әндер айтқызып,  ойындар ойнатып, жұмбақтар жасырды.

Сайыс үш кезең бойынша өткізілді. Байқауда Тленшиев Бақыт, Абдрахманова Зарина, Мырзабеков Алмас, Сулейменова Мөлдір, Хамитов Асылжан, Лагина Валентина таныстыру, жасырылған музыкалық әндерді табу, викториналық сұрақтар бойынша өзара сынға түсті. Нәтижесінде әділ-қазылар алқасының шешімімен көп ұпай жинаған, байқауда белсенділік танытқан Абдрахманова Зарина мен Тленшиев Бақыт үш кезең бойынша үздік болып, «Күзгі бал – 2023» байқауының  «Күз ханзадасы» мен  «Күз ханшайымы» атанды. II орынды тартымды жұп  Мырзабеков Алмас пен көп балалы ана Сулейменова Мөлдір, III орынды талантты жұп Хамитов Асылжан мен Лагина Валентина жеңіп алды.

Байқауға қатысушылар ақшалай сыйлықтармен марапатталды. Мереке өте қызықты да тартымды өтті. Міне, осылайша «Күзгі бал – 2023» байқауы өз мәресіне жетіп, би кешімен аяқталды.

Шараға 78 адам қатысты.

Назым Момбекова, өнер және спорт әдебиеттері бөлімінің қызметкері