Халықаралық зағиптар күніне орай ақпараттық сағат

2023 жылдың 9 қарашасында Кітапхана ісін дамыту, библиография және тифлология бөлімінің қызметкерлері Алматы қаласы білім басқармасының «№ 4 арнайы мектеп-интернаты» КММ-де Халықаралық зағиптар күніне орай ақпараттық сағат өткізді.

Іс-шара барысында  оқушыларға зағиптар күнінің шығу тарихы туралы ақпарат берілді. Жалпы, 13 қараша – Халықаралық зағиптар күні атақты француз ағартушысы, тифлопедагог Валентин Гаюидің туған күніне орай  белгіленген. Ол дүние жүзіндегі алғашқы зағиптар мектебін ашып, кітаптарды бедерлі-сызықты басып шығару әдісін және зағиптарға арналған жазу құралын, бірінші рельефті глобусты жасаған.

Кітапхана қызметкерлері зағиптар күнінің шығу тарихы туралы ақпарат берумен шектелмей, оқушылардың білімдерін, қызығушылықтарын арттыру және сергіту мақсатында оларға көз жанарына  байланысты қызықты деректер ұсынды. Сондай-ақ, ақпараттық сағат барысында оқушылар мен ұстаздарға тақырыпқа қатысты викториналық сұрақтар қойылды. Сұрақтарға жауап беруде оқушылар белсенділік  танытты. Іс-шараға ұстаздар мен оқушылардан 17 адам қатысты.