Наурыз – бақыт пен шаттық мерекесі

Ағымдағы жылдың наурыз айының 17-ші  жұлдызында Зағип және нашар көретін азаматтарға арналған республикалық кітапханада Ұлыстың ұлы күні – Наурыз мейрамына орай «Наурыз – бақыт пен шаттық мерекесі» атты  әдеби-сазды кеш өтті. Іс-шараның мақсаты: «Наурыз» мейрамы туралы  қазақ халқының салт — дәстүрін көрсету және оны құрметтей білуге тәрбиелеу. Наурыз мерекесінің қазақ даласындағы орны, наурыз мерекесі және наурыз мерекесін ұлттық салт-дәстүрімізбен, әдет-ғұрпымызбен байланыстыра насихаттап, ұрпақтардың өз ұлтына деген сүйіспеншілігін арттыру.

Кітапхана директорының орынбасары Мақсут  Тайынұлы Жұмабеков  жиналған барша қауымды  наурыз  мерекесімен  құттықтап, жылы лебізін білдірді.

Кеш қонақтарына  наурыз мерекесіне орай дайындалған бейнебаян ұсынылды. Кеште  Алматы облыстық Білім басқармасы «Қаскелең мәдениет колледжі» студентері Жалғас Арнаұлын «Ассаламуағаллейкум», Бернар Сағынтаев «Мен қазақпын» әндерімен көпшілікті тамсандыра ән салса, Николай Островский атындағы зағиптар және көздері нашар көретін балаларға арналған №4 арнайы мектеп интернаты «Коммуналдық мемлекеттік мекемесі» «Наркескен» домбырашылар ансамблі  Құрманғазының «Балбырауын», Малғаждар Әубәкіровтың «Өрлеу»  күйін орындап, күйден шашу шашты. Кітапхана қызметкерлері Хабибуллаева Дурдона «Наурыз көктем»,  Әбдірахманова Назымхан «Жақсы адамдарым» әндерін орындап келген қонақтардың ықыласына бөленіп, риза етті.

Іс-шара соңында  балалардың көрсеткен өнерлеріне алғыс айтып, сыйлықтар тапсырылды. Қонақтар наурыз көжеден, бауырсақтан дәм татты. Наурыздағы барша тілектеріңіз қабыл болсын, ақ мол болсын, әр адамның арманы мен мақсаты орындалсын. Ұлыстың ұлы күні құтты болсын,  ағайын!

Шараға барлығы 58 оқырман қатысты.

Назым Момбекова,

Өнер және спорт әдебиеттері

бөлімінің қызметкері