Ашық есік күндері

2022 жылдың қазан айының 18-21 жұлдызы аралығында «Зағип және нашар көретін азаматтарға арналған республикалық кітапхана» РММ-де республикамыздағы кітапханашылардың  кәсіби мерекесі  қарсаңында жыл сайынғы дәстүрлі шара «Ашық есік» күндері өткізілді.

Шараның мақсаты: келушілерді кітапхана қызметімен таныстыру, зағип қызметкерлердің жұмыс орындарын көрсету, кітапханаға жаңа оқырмандарды тарту.

Айтулы күндері кітапханаға Алматы қаласындағы «Жоғары медициналық колледжі», Қазақ ұлттық қыздар педагогикалық университеті, Абай атындағы Қазақ  ұлттық педагогикалық университеті студенттері, Есік қаласындағы «Көру қабілеті бұзылған балаларға  арналған арнайы мектеп интернат» мұғалімдері, Қаскелең мәдениет колледжінің студенттері мен мұғалімдері және Қазақ ұлттық аграрлық университеті, Республикалық ғылыми –педагогикалық кітапхана кітапханашылары келді.

«Ашық есік» күндері аясында «ЗНКААРК» РММ-нің кітап қорындағы «Жаңа кітаптар» көрмесі, «ҚР тарихи және мәдени ескерткіштері тактильді кітапта» тактильді кітаптар көрмесі ұйымдастырылады.

Кітапхана бөлімдері бойынша экскурсия жүргізіліп, келушілер дыбыс жазу студиясы жұмысы барысымен, жайпақ баспа қаріпті мәтінді Брайль қарпіне аудару және оны пайдаланушылар үшін басып шығару процесімен, зағип мамандардың жұмыс орындарымен (тифлокомплекс) таныстырылды. Электронды ресурстар залында Абдыкаимов Зият Нұрланұлы туралы «Зағип студент – Н. Назарбаев университетінің реформаторы» тақырыбындағы деректі фильмі көрсетіледі.

Кітапхана ісін дамыту, библиография және тифлология бөлімінің қызметкерлері келушілерді оңалту кабинетінің жұмысымен таныстырып, мүмкіндігі шектеулі жандарды ортаға бейімдеу туралы ақпараттар берді. «Саусақ ұшындағы әлем» тифлоқұралдар көрмесімен таныстырып, «Біздің басылымдар» атты бөлімде шығарылатын әдістемелік құралдармен, библиографиялық көрсеткіштермен таныстырды.

 Шара  барысында  қазақтың ұлы жазушысы, қоғам қайраткері, филология ғылымдарының докторы, профессор М. О. Әуезовтың туғанына 125 жыл толуына орай «Дәуірдің дара тұлғасы» биобиблиографиялық көрсеткішінің тұсаукесері өткізілді.

Ашық есік күндері кітапханада Қазақстанның еңбек сіңірген қайраткері, «Құрмет» орденінің иегері, Қазақстан Композиторлар одағының мүшесі, композитор, термеші, Республикалық термешілер конкурсының лауреаты Донеділ Қажымовтың туғанына 70 жыл толуына орай әуенді дәріс, Қазақ әдебиетінің көрнекті өкілі, жазушы — Шерхан Мұртазаның 90 жылдық мерейтойына арналған «Мылтықсыз майдан жауынгері» атты ақпаратты-танымдық шара өтті.

  19-қазан күні кітапханада Халықаралық  Ақ таяқ күні  аясында өткізілген байқаудың қорытындысы бойынша жеңімпаздар марапатталды.

Байқау 4 номинация негізінде ұйымдастырылған болатын.

— Брайль жүйесі бойынша мәтінді қазақ тілінде оқу;

— Брайль жүйесі бойынша мәтінді орыс тілінде оқу;

— Бедерлі-графикалық құралдарды тану;

—  ҚР монеталарын анықтау.

Ашық есік  күндері кітапханаға 167 адам келді.

Кітапхана ісін дамыту,  библиография және тифлология бөлімінің жетекшісі, Алия Рахимжанова.