Алпамыс мектепке барады

Ағымдағы жылдың 29-шы маусымында Зағип және нашар көретін азаматтарға арналған республикалық кітапхана 2022 жыл – Балалар жылына орай қазақ балалар киносының классигі, режиссер Абдолла Қарсақбаевтың қазақ киносының алтын коллекциясы «Алпамыс мектепке барады» атты балалар көркем фильмін кітапхананың жас оқырмандарына көрсетті.
Іс-шараның мақсаты: Балалардың жазғы демалыс уақытын тиімді өткізу, қанша мәрте қайталап көрсең де жалықтырмайтын жауһармен кішкентай көрерменді таныстыру, балаларға арналған қазақ киносын насихаттау.
Кішкентай Алпамыс пен Қалихан бір ауылдың балалары, екеуі дос. Жасы жетіге келген Қалихан жаңа оқу жылы басталғанда мектепке барады, ал алты жастағы Алпамыс қалып қояды. Досының оқитынына қатты қызыққан оның бар арманы мектепке бару. Мектеп терезесінің алдына келіп, мұғалімнің іс-әрекетін бақылап, өтіп жатқан сабақты түсінуге тырысады. Ал досы Қалиханның сабаққа аса құлшынысы болмайды. Бірақ, ол досының алғырлығын алға тартып, оның мектепке баруына көмектеседі. Екі достың тілегі қабыл болып, алты жасар Алпамыс 1-сыныпқа қабылданады. Баланың мектепке құштарлығын арттыратын осынау көркем дүние туралы түсірілген режиссер Абдолла Қарсақбаевтың «Алпамыс мектепке барады» атты балалар көркем фильмін кітапхананың жас оқырмандары ерекше ықыласпен тамашалады.
«Фирдаус» қоғамдық қорының президенті Мұрат Құрманбеков балаларға тәтті балмұздақ үлестірді.
Шараға барлығы 17 жас оқырман қатысты.