Алабұға аулаған күн – бедерлі –нүктелі қаріпте және MP3 аудио нұсқада

Зағип және нашар көретін азаматттарға арналған республикалық кітапханасында, Толымбек Әбдірайымның «Алабұға аулаған күн» атты кітабының бедерлі – нүктелі қаріпте және MP3 аудио нұсқада тұсау кесері болды. Аталмыш іс-шара «Бір ел – бір кітап» акциясы аясында, онлайн түрде ZOOM платформасында өтті. Естеріңізге сала кетсек, осыдан бір ай бұрын Рамазан Думанның «Пешене» пьесалар жинағының MP3 аудио нұсқада тұсауын кескенбіз. Алайда, бүгін өткен тұсау кесер рәсімінің орны ерекше. Себебі, «Алабұға аулаған күн» әңгімелер жинағы балалар әдебиеті саласына кіреді. Осы орайда, кітапхана ұжымы «Балалар мен жасөспірімдердің кітап оқу жылына да» атсалысып жатыр десек болады. Іс-шараның құрметті қонағы ретінде жинақ авторы Толымбек Сылдырбайұлы қатысты. Жазушы өз кезегінде кітапхана ұжымына алғыс білдіріп, алдағы жұмыстарына сәттілік тіледі.

Зағип және нашар көретін азаматтарға арналған республикалық кітапхананың ең басты міндеті оқырмандарға қолайлы жағдай туғызу, мүмкіндігі шектеулі жандарға қазақ және әлем әдебиетінің қол жетімді болуын қадағалау.  Оның ішінде, балалар мен жасөспірімдердің кітап оқуы, білімге құштар болуы біз үшін үлкен қуаныш. Сондықтан, «Бір ел – бір кітап» акциясы мен «Балалар мен жасөспірімдердің кітап оқу жылын» барынша қолдауға тырысудамыз. «Жақсы кітап – жан азығы» демекші, кітап оқып, көңілімізді тойдырып жүрейік.

Аманғалиева Аружан ЗНКААРК РММ баспасөз хатшысы