«Пешене» пьесалар жинағының MP3 аудио форматта тұсау кесері

«Зағип және нашар көретін азамататарға арналған кітапхана» республикалық мемлекеттік мекемесінде, Тәуелсіздігіміздің 30 жылдығына арнап «Бір ел – бір кітап» атты акциясына енгізілген 30 кітаптың ішіндегі Думан Рамазанның «Пешене» атты кітабының тұсау кесеріне орай, «Сөйлейтін» және Брайль кітаптарын шығаратын бөлімінде МР3 форматта дыбыстандырылған кітабы жарыққа шықты.

Бұл кітап талантты жазушы, дарынды драматург, халықаралық «Алаш» әдеби сыйлығының иегері Думан Рамазанның жаңа жинағына «Керей — Жәнібек», «Пешене», «Бейуақ», «Қанатталды», «Кек» атты драматургиялық төл туындылары мен шетел қаламгерлерінен аударған пьесалары топтастырылған.

Автор тарихи һәм қазіргі тақырыптарға қатар қалам тербейді. Көркем шығармаларда тарихи тұлғалардың ақыл-парасаты, келешекке көз тастар көрегендігі, тереңнен ойлап, кеңінен байлам жасар кемеңгерлігі, ел бастар көсемдігі, сөз бастар шешендігі мен қол бастар батырлықтары айрықша айшықталса, өзімізге етене таныс бүгінгі күн қаһармандарының тыныс-тірлігі мен іс-әрекеттері ерекше суреткерлік шабытпен кестеленген. Шығармалардың тілі шұрайлы, ойы орамды, көркемдік қуаты жоғары.

Бұл кітаптың тоғыз бөлімнен тұратын «Пешене» атты трагедиялық шығармасындағы 2-ші бөліміндегі көріністен кітапхана қызметкерлері көрсеткен қойылымын ұсындық.

Іс-шара кітапхана директоры А. Байұзақовтың сөзімен басталды. «Сөйлейтін» және Брайль кітаптарын шығару бөлімінен М. Әмірова Рамазан Думанның өмір баянымен таныстырды.