ҚР-ның дойбыдан спорт шебері Болат Жанымхан

2020 жылдың 25 желтоқсанында зағип және нашар көретін азаматтарға арналған республикалық кітапхананың өнер және спорт әдебиеттері бөлімі кітапхананың әлеуметтік желілерінде онлайн-режимде жас әрі талантты дойбышы, қазіргі таңда үлкен белестерді бағындырып жүрген ҚР-ның дойбыдан спорт шебері Болат Жанымхан жөнінде ақпарат берді.

Ақпараттың мақсаты: оқырмандарға спорт шебері Болат Жанымхан туралы айту. Болат Жанымхан Қазақ туризм және спорт академиясының дойбы тобы бойынша 4-ші курс студенті. Ол 1996 жылы 16 қаңтар күні Қытай Халық Республикасы Шыңжан облысы, Баркөл Қазақ автономиялық ауданында дүниеге келген. 2006 жылы отбасымен ҚР-на көшіп келді. Жанымхан басында жалпы білім беретін мектепте оқыды, велосипедпен жүруді жақсы көрді, кейін көру қабілетінің нашарлауына байланысты 2009 жылы Н.Островский атындағы зағиптер және көздері нашар көретін балаларға арналған №4 арнайы мектеп-интернатына ауыстырылды. Ол мектепті жақсы оқыды, сынып белсендісі болды. Мектеп қабырғасында ол домбыра сыныбында оқып, музыкамен айналысты.

Жанымхан 2009 жылдан бері дойбы және шахмат ойындарымен айналысты. Қазіргі таңда ол дойбыдан спорт шебері және Алматы мен Алматы облысының бірнеше дүркін чемпионы. 2017 жылы Атырау қаласында өткен Қазақстан Республикасының спартакиадасында спорт шебері мәртебесін алу үшін қажетті разрядтарды орындады. Зағип жасөспірімдер мен балалар арасында бірнеше дүркін чемпион, сондай-ақ ересек спортшылар арасында Қазақстан Республикасы бойынша дойбыдан чемпион.

Ол шахматтан 2013 жылы жасөспірімдер арасында Малайзия мемлекетінде өткен чемпионатта 1-ші орын алып, Азия чемпионы атанды.

«Жігітке жеті өнер де аз» демекші, Жанымхан, сонымен қатар «Голбол», «Футбол» ойындарында ойнайды.

Голбол ойынымен 2016 жылдан бастап айналысады. Қазіргі таңда Қазақстан құрамасына кіріп, команданың жетекші ойыншысы болып табылады. Тайландта, Германияда, Ресейде өткен голболдан жарыстарға қатысты.

Жанымхан тек спортта ғана емес, өмірде де бірінші болуға тырысады, ол барлық жағынан белсенді адам.

Оның бүгінгі күнгі жеке мақсаты – дойбыдан халықаралық спорт шебері болу және халықаралық жарыстарда өз Отаны – Қазақстанның атын әлемге таныту.

Жас отбасына махаббат, бақыт, сәттілік және барлық армандары мен мақсаттарының орындалуына тілектеспіз!

Жұмағалиева Ж.Ж.

Өнер және спорт әдебиеттері

бөлімінің қызметкері