Зағип спортшылар арасында Жүз клеткалы дойбы бойынша Әлем және Еуропа чемпионы Никифоров Геннадий Александрович

2020 жылдың 25 қыркүйегінде Зағип және нашар көретін азаматтарға арналған республикалық кітапхананың өнер және спорт әдебиеттері бөлімі әлеуметтік желілерінде онлайн режимінде көзі көрмейтін спортшылар арасында жүз клеткалық дойбы бойынша Әлем және Еуропа чемпионы, I топтағы мүгедек Никифоров Геннадий Александрович жөнінде ақпарат берді. Ақпараттың мақсаты: оқырмандарға спорт шебері Г. А. Никифоров туралы айту. Ол жеңіске деген құштарлығы зор, ұзақ уақыт бойы өз мақсатына жету үшін биік белестерді бағындырған, Польшадағы зағип спортшылар арасында жүз клеткалық дойбыдан Әлем және Еуропа чемпионы атанып, 1-ші жүлделі орынға ие болған адам. Геннадий Никифоров 1951 жылы 17 қазанда Алматы қаласында дүниеге келген. Оның көру қабілеті бала кезінде қызылша ауруымен ауырғаннан кейін нашарлады. Содан кейін ол Алматыдағы № 35 орта мектепте оқыды. Көру қабілетінің әлсіз болғандығынан оған оқу қиын болды, тіпті бірінші партадан да тақтадағы тапсырманы оқи алмады, дегенмен 1969 жылы Геннадий мектепті бітіріп, Қазақ соқырлар қоғамының № 3 Алматы оқу-өндірістік кәсіпорнына жұмысқа тұрды. Ол онда алғаш рет дойбы ойнап көріп,оған ойын ұнағандығын, оның қолынан келетіндігін байқады. Содан бері ол көзі нашар көретін сондай-ақ көзі көретіндер арасында қалалық, облыстық жарыстарға қатыса бастады.

2013 жылы 6-13 қыркүйек аралығында осындай турнир Августов қаласында (Польша) өтті. Жарысқа Польша, Қазақстан, Литва, Украина сияқты 4 мемлекеттің өкілдері келді.

Екі турдан кейін Геннадий екі рет қатарынан жеңіске жетіп, көш бастап тұрды. Бұл жеңісі турнир аяқталғанға дейін бастаманы жіберіп алмауға мүмкіндік берді. Нәтижесінде 20 ұпайдың ішінде 15 ұпайды қоржынына салған Геннадий Әлем және Еуропа чемпионы атағын жеңіп алып, 1-ші орынға ие болды.

Жарыс соңында тұғыр үстіне бекітілген глобус түріндегі жер шары естелік кубок табысталды, сондай-ақ, медаль, диплом және 100 доллар көлемінде сыйлық берілді. Барлық қатысушылар ұйымдастырушылар мен төрешілерге жарысты жақсы ұйымдастырғандары үшін алғыс айтып, жаңа турнирлер өткізу туралы тілектерін білдірді.

Енді Геннадий үшін алдында тұрған басты міндет – жаңа турнирлерде қол жеткізген биіктікті сақтап, алдағы уақытта талай белестерді бағындыру.

Жұмағалиева Ж.Ж.,

өнер және спорт әдебиеттері

бөлімінің қызметкері