Халықаралық вебинар – жас ғалымдардың тәжірибе алмасу алаңы

«Жастар және Абайдың рухани құндылықтары» атты ҚР арнайы кітапханалары Жас кітапханашыларының II Слетінің екінші күні онлайн семинар—тренингтер мен вебинарлар өтті. Жобаны «Зағип және нашар көретін азаматтарға арналған республикалық кітапхана» ұйымдастырды.

Вебинарды кітапхана директоры Асхат Байұзақов жүргізді. Спикер COVID-19 індетіне байланысты карантинге көшкеннен кейін арнайы кітапханалардың қашықтықтан жұмыс жасау барысы туралы айтып өтті.

«Бүгінде жұмыс тәртібі жаңа форматқа көшті. Бұл уақыт талабы. Игі шарамыздың мақсаты осы жұмыстарымызды дамыту, жетілдіру мақсатында ұйымдастырылып отыр. Халықаралық  вебинар – жас ғалымдардың тәжірибе алмасу алаңы. Мұндай шараларды алдағы уақытта да жалғастыратын боламыз» деп атап өтті Асхат Байұзақов.

Қазақстан Республикасының Ұлттық академиялық кітапханасы директорының ақпараттық ресурстар бойынша орынбасары – Нұржан Жолдыбалинов жобаға қатысып, заманауи ақпарат құралдарын пайдаланудың жаңа жолдары туралы айтты.

Нұржан Жолдыбалинов Ұлттық академиялық кітапханасының жұмысы туралы айтып берді. Ол – кітапханашылардың компьютер технологияларын қолдануды жетік меңгеру, электрондар тасқынындағы ғылыми ақпараттардан да хабардар болу, қызмет барысында қашықтағы мәліметтер базасын, виртуальді анықтама қызметін, құжаттарды электронды жеткізу секілді замануи қызмет көрсету туралы тәжірибесімен бөлісті. Сондай-ақ, «Қазақстандық Кітапханалық Одақ» ЗТБ білікті жас маманы –Үміт Әшімжан, Санкт-Петербург қаласындағы «AIESEC» халықаралық жастар ұйымының вице-президенті – Динара Қалыбаева, «Спорт без границ» жобасының жетекшісі – Бахтияр Базарбеков қатысып, кәсіби тәжірибелерімен бөлісті.

Халықаралық вебинар пікір алмасумен жалғасын тапты. Шара барысында қатысушылар қызықтырған сауалдарын қойып, толыққанды жауаптар ала алды.

https://www.facebook.com/rbnsg/videos/651646368784959/