Рухты оятқан жалынды қаламгер

Кітапханамызда Ауған соғысының ардагері, Мәжіліс депутаты, жазушы, ақын Бақытбек Смағұлұлының 60 жылдық мерейтойына және Ауған соғысының 31 жылдығына арналған кеш өтті.

Игі шараға Л.Гумилев атындағы Еуразиялық Ұлттық Университет кітапханасының директоры Оразалиев Бахытжан Әсетілдәұлы, Ауған соғысының ардагері, «Қызыл Жұлдыз» және Құрмет ордендері және бірнеше медальдардың иегері Пірмашов Қожахмет Толысбекұлы, Ауған соғысының ардагері, «Айбын» орденінің иегері Сейітұлы Аллажар қатысты. 

Кітапхана директоры Асхат Құсайынұлы Бақытбек Смағұлұлының 60 жасқа толған мерей тойымен құттықтап, кітапхана оқырмандары мен жастарға тәуелсіздігіміздің құндылығы мен маңыздылығы туралы айтты.

«Батыр Бақытбек Смағұлұлы тек жауынгер ретінде ғана емес, рухты оятқан жалынды қаламгер ретінде де танимыз. Бүгінгі шараның мақсаты батырларымыздың, ел қорғаған ерлеріміздің ерлігін кейінгі ұрпаққа үлгі ете отырып, жастарды Отансүйгіштікке, ерлікке баулу. Бақытбек Смағұлұлын 60 жасқа толған мерей тойымен құттықтаймыз», деп атап өтті Асхат Құсайынұлы.

Мерейлі кеште өнерпаздардың орындаған күй-терме, ғибратты ән-жырлары мерекенің әрін кіргізіп, жиналғандарға қуаныш сыйлады. Бақытбек Смағұлұлының өлеңдері оқылып, көрермен көңіліне ой салып, ерекше әсерге бөледі. Қонаққа келген азаматтарға кітапхананың атынан арнайы алғыс хат берілді.

Баспасөз қызметі