«Зағип және нашар көретін азаматтарға арналған республикалық кітапхана» РММ-де дәстүрлі шара оқырмандар конференциясы

2019 жылдың желтоқсан айының 11 жұлдызында «Зағип және нашар көретін азаматтарға арналған республикалық кітапхана» РММ-де жыл сайынғы дәстүрлі шара оқырмандар конференциясы өтті.

Кітапхана директоры А.К. Байұзақов жыл сайынғы дәстүрлі шара оқырмандар конференциясын «2019 жылы ЗНКААРК РММ-нің атқарған жұмысы туралы» есебін оқырмандарға баяндап және құттықтау сөзімен ашты. А.К. Байұзақов өз баяндамасында кітапхана қызметінің жұмысының статистикалық көрсеткіштері, оқырмандарға қызмет көрсету қызметтерін енгізу, кітапханада өткізген көпшілік іс-шаралар, көрмелер, кітапхана шығарған басылымдар туралы, ағымдағы жылы компьютерлік сауаттылық пен оңалту бойынша өткізілген сабақтардың саны, бүгінгі күні кітапхана қорын құрайтын кітаптардың саны туралы ақпарат беріп, кітапхана жұмысын қорытындылады. Кітапхананың 2020 жылға арналған жұмыс жоспары мен міндеттері туралы баяндады.

«Сөйлейтін» және Брайль кітаптарын шығару бөлімінің меңгерушісі                             Н.Д. Баймуратова 2019 жылы шығарылған нүктелі-бедерлі және жайпақ баспалы қаріп бойынша дыбысталған, тактильді кітаптар, брошюралар бойынша ақпарат берді. Бөлім қызметкері Б. Сыздықов нүктелі-бедерлі қаріпте жарық көрген Фариза Оңғарсынованың «Мен саған ғашық емес ем…» атты кітабына тұсаукесерін жасап, ақынның өмірі мен шығармашылығына тоқталып, өлең жолдарынан шағын үзінділер оқыды.

Сонымен бірге кітап қорын толықтыру, өңдеу  және каталогтарды ұйымдастыру бөлімінің меңгерушісі Т. Ю. Рогаткина 2019 жылдың 1 желтоқсан дейінгі кітапханадағы кітап қорының қысқаша есебін жасады.

Шара оқырмандардың кітапхана директоры және кітапхана қызметкерлеріне қойылған сұрақтарымен жалғасып, ұсыныстары тыңдалды.

Конференцияда 9 адамнан тұратын «Кітапхана кеңесін» құру, «Кітапхана кеңесінің» ережесін әзірлеу, зағип жандарды және мүмкіндігі шектеулі балаларды қолдау қорының жетекшісі Б. Базарбековпен бірге зағип жандарды  сүйемелдеу  бойынша бейнеролик түсіру туралы ұсыныстар айтылып, қабылданды.

Конференция соңында кітапхананың белсенді оқырмандарын кітапхана директоры А.К. Байұзақов мақтау қағаздарымен марапаттады.

 Шараға 55 адам қатысты.

Кітапхана ісін дамыту,

библиография және тифлология бөлімі