«Алашты пір тұтқан ақын»

Маусым айының 12-жұлдызында «Зағип және нашар көретін азаматтарға арналған республикалық кітапхана» РММ-де жүрекжарды өлеңдерімен, шабытты шығармаларымен халықтың көз қуанышына айналып жүрген ақын  әрі жазушы, Қазақстан Жазушылар одағы мен Әлем халықтары Жазушылар одағының мүшесі, М. Шолохов атындағы Халықаралық алтын медалдың лауреаты, Абай атындағы Халықаралық «Шығыс шынары» жыр мүшайрасының екі мәрте жеңімпазы және О. Хайдари-Дулати атындағы Халықаралық сыйлықтың лауреаты, Халықаралық «Алаш» сыйлығының иегері, «Екі мың жылдық дала жырлары», «Қазақ жерінің» зиялы азаматтары», «Жыр маржаны» сияқты энциклопедиялар мен анталогияларға шығармалары енген, онға тарта жыр жинағы мен екі томдық «Қаракерей Қабанбай» тарихи көркем шығарманың авторы  Зейнолла Тілеужановтың «Алашты пір тұтқан ақын» атты  шығармашылық кеші өтті.

Шараның мақсаты Зейнолла Тілеужанұлының шығармашылығымен және ақынның шоқтығы биік туындыларымен таныстыру әрі насихаттау.

Шара барысында жүргізуші ақынмен көптеген қызықты сұрақтармен және ақынның өмірінен бір үзік сыр шертетін, шығармашылық ізденісі, тынымшыл еңбегінің көрінісі ретінде еңбек жолында жеткен жетістіктеріне арналған бейне сюжеттермен  ұласты. Кеш қонағы зағип ақын Ә. Тоқтаған жылы лебізін білдіріп қана қоймай, қазақтың ұлттық киімі шапанды сыйға тартты.  Кітапхана ісін дамыту, библиография және тифлология бөлімінің кітапханашысы Ажарбаева Жансая «Анама» атты өлеңін оқып берді. Сонымен қатар ақын өз қаламынан туындаған «Манет аруға», «Құралайға», «Алғашқы махаббат», «Қаракерей Қабанбай» атты өлеңдерін оқыды. Кітапхана директоры А. Байұзақов жыр кешін қорытындылады.