«Ұранды ердің — ұрпағы қайсар»

Ағымдағы жылдың мамыр  айының үшінші жұлдызында Кітапханада Отан Қорғаушылар күніне орай  «Ұранды ердің – ұрпағы қайсар» атты іс-шара болып өтті.

Шараның мақсаты:  7 мамыр Қазақстан Республикасының Қарулы Күштерінің құрылған күні болғандықтан кітапханадағы еліміздің өркендеуіне аянбай еңбек етіп жатқан ер азаматтарды  мерекелерімен құттықтау мақсатында мерекелі іс-шара  ұйымдастыру.

Халқымызда «Ер – елінің қорғаны» деген аталы сөз бар. Біз осындай жандардың ержүрек істеріне сай сый-құрмет көрсете отырып, отбасыларыңызға амандық, береке-бірлік, еңбекте жеміс пен шығармашылық табыстар тілейміз. Бүгінгі 7-мамыр Отан қорғаушылар күні мерекелеріңіз құтты болсын! — деп бастады шараны ұйымдастырушы.

7 мамыр еліміздің қорғаныс қабілетінің кемелденгенін білдіретін мереке күні, яғни, Отан қорғаушылар күні! Осы мереке қарсаңында біздің нәзік жанды әйел қауымы кітапхананың ер-азаматтарын атаулы күнімен құттықтап, мерекелік концерт ұйымдастырды. Мерекелі кеште  қыз-келіншектер ерекше сипатқа ие игі тілектері мен өнерлерін көрсетумен қатар,   өздері дайындаған мерекелік скетч, әсем әндерімен  ер-азаматтардың көңілдерін көтеріп тастады. Бұл концертте өлең мен жыр жырланып, ән айтылды. Отан қорғаушыларға шын ниеттен тілектер тіленіп, сыйлықтар сыйланды.

Ер-азаматтардың орны қашанда бөлек. Олардың күш-жігеріне, ақыл-парасатына бүкіл әлем бағынған, бағынады да! Сондықтан халқымыз «Жердің қорғаны, елдің тұтқасы» деп ерекше ардақтаған. Ал ақын Мұхтар Шаханов:

…Жердің аман тұрғандығы,

Сол намысқой еркектердің арқасы…

Немесе

…Қайғы келсе жеңілмейтін,

Бақыт келсе, семірмейтін,

Ер мінезін қадірлейтін,

Еркектердің даңқы артсын! — деп жырға қосқан.

Арыстан келбетті, жолбарыс жүректі, қырандай қырағы, намысқой, ер мінезді азаматтарымызға жігерлеріңіз мұқалмасын, асқақ шыңдарды бағындырып, қонар тұғырларыңыз биіктей берсін дей отыра, мерекелі кешті аяқтады.

Дегенменде біздің ару қыздарымыз ер азаматтарымыздың сәні мен мәні ғой деп сөз бастаған  кәсіподақ ұйымының мүшесі Салтанат Сайранбекқызы кәсіподақ атынан құттықтап сөз сөйлеп, ер-азаматтарға  сыйлық табыс етті. Кеш соңында қанша дегенмен, біз, қыздар қауымы ер-азаматтарға арқа сүйейміз, қамқорлықтарына зәруміз, әрқашан жанымыздан табылғандарына алғыс айтып,  жақсылық,  ашық аспан тілеп, ұлы даланың ұлы ұрпақтарына арналған мерекелі кеш аяқталды.

Отан Қорғаушылар күніне арналған мерекелі іс-шара Елбасы

Н. Назарбаевтың «Ұлт жоспары-100 қадам баршаға арналған қазіргі заманғы мемлекет» бес институттық реформасын жүзеге асыруға бағытталған 100 нақты қадамның «Біртектілік пен бірлік» атты 4-ші бағытының 87-ші қадамы «Менің елім» кең көлемді жобасын қамтыды.

Отан Қорғаушылар күні мерекесіне арналған іс-шара өз деңгейінде өтті. Ұйымдастырушы өнер және спорт әдебиеттері бөлімінің қызметкерлеріне кітапхана ұжымы алғысын білдірді.

                  Назым Момбекова,

 Өнер және спорт әдебиеттері

 бөлімінің қызметкері