«Қош келдің, әз Наурыз!»

   Ағымдағы жылдың наурыз айының 20-шы  жұлдызында Зағип және нашар көретін азаматтарға арналған республикалық кітапханада Ұлыстың ұлы күні — Наурыз мейрамына орай «Қош келдің, әз Наурыз!» атты  мерекелік іс-шара өтті. Мерекеге кітапхана ардагерлері мен оқырмандары және кітапхана қызметкерлері қатысты. Наурызға арналған мерекемізде келген қонақтарға шашу шашылып, ежелден келе жатқан дәстүріміз «Көрісу» салты бойынша қонақтармен көрісіп,  наурыз көже мен ұлттық тағамдар ұсынылып, қайырымдылық акциясы ұйымдастырылды. Ұлттық ойындардан жарыстар болды. Ақсақалдар мен әжелерге мерекелік сыйлықтар берілді. «Қош келдің, әз Наурыз!» атты театрландырылған қойылым-концерт қойылған соң,  Қызыр ата келіп бата берді. Жасы кіші балалар келіп үлкендермен қос қолдап амандасып, Қызыр атаның әкелген сыйлықтарын алды. Кітапхана директоры Асхат Құсайынұлы Байұзақов жиналған халықты Наурыз мерекесімен құттықтап, Ұлыстың ұлы күні — Наурыз мейрамы жоғары дәрежеде тойлануын айта келе, Наурыз ежелден келе жатқан ұлттық мереке екенін атап айтты. Кеште Тайжанова Айнұр  «Құтты болсын, әз Наурыз!, Қалиева Фарида «Наурыз көктем», Любовь Тарасова «», Геннадий Демин «» әнін айтса, ақын Әбетхан Тоқтаған «Желпінтіп Наурыз жеттіңбе» атты өлеңін оқып,  Светлана Тоқабаева «Әсем әнін», Айтжанова Әспеткүл мен Айтжанов Азамат «Қазақы дастарханым» әнін орындаса,  Қожахметов Мирас күйден шашу шашып,  көпшіліктің көңілін бір көтеріп тастады.

Мерекеде көпшілік кітапхана қызметкерлері дайындаған өнерлерін көріп тамашалады. Өнер және спорт әдебиеттері  бөлімі  театрландырылған «Көрісу»  көрінісін,  кітап қорын сақтау және абонемент бөлімінің атынан Полянный Евгений «Наурыз», сөйлейтін және Брайль кітаптарын шығару бөлімінің қызметкері Сыздықов Болатхан «Наурызым» өлеңін және жеке қызмет көрсету бөлімінің атынан әнші Садырбаева Айша халық әні «Гүлдерайым», Жамбыл атамыздың әні «Елге сәлем» әндерін   жұртшылықтың назарына ұсынды.

Шараға, сонымен қатар, Мәскеу қаласынан Юлия Дьякова атты жанында көмекші иті бар, зағип әнші қатысып, өз өнерімен қонақтарды таң қалдырды. Оны Қазақстанда өтетін «Халықаралық өнер күндері» көп жанрлы халықаралық фестиваль-байқауға қатысу үшін шақырған екен.

Іс-шара соңында  кітапхана қызметкерлерінің көрсеткен өнерлеріне  алғыс  айтып, сыйлықтар тапсырылды.

Ұлыстың ұлы күні – Наурыз мейрамына орай кітапханамызда кітапхана қызметкерлері арасында спорттық ойындардан жарыс өтті. Шахмат  ойынынан бірінші орынды Айшуақова Капиза иеленсе, екінші орынды Джакупов Марлен, үшінші орынды Касенов Алмас алды. Сонымен қатар, дойбыдан  бірінші орынды Құсайынова Меруерт, екінші орынды Арынбекова Назымгүл және үшінші орынды Киргизбаева Күнсұлу иеленді. Жүлделі орын алушылыр дипломмен марапатталды.

Наурыздағы барша тілектеріңіз қабыл болсын, ақ мол болсын, әр адамның арманы мен мақсаты орындалсын. Ұлыстың ұлы күні құтты болсын,  ағайын!-деп көпшілікке арналған ойын-сауық  көңілді ән мен бимен  аяқталды.

Аталған шара Елбасы Н.Ә. Назарбаевтың «Ұлт жоспары-100 қадам баршаға арналған қазіргі заманғы мемлекет» бес институттық реформасын жүзеге асыруға бағытталған 100 нақты қадамның «Біртектілік пен бірлік» атты 4-ші бағытының 87-ші қадамы «Менің елім» кең көлемді жобасын қамтыды.

                                                                                                Назым Момбекова,

                                                                                            Өнер және спорт әдебиеттері

                                                                                                       бөлімінің қызметкері