Әбділда  Тәжібаевтың туғанына 110 жыл толуына орай ұйымдастырылған «Өмір мен поэзия» атты  кітап  көрмесі

4-ші ақпанда  Зағип  және нашар көретін азаматтарға  арналған  республикалық кітапхананың жеке қызмет көрсету бөлімінде ақын, драматург, Қазақстанның халық жазушысы  Әбділда Тәжібаевтың туғанына 110 жыл (1909-1998) толуына орай «Өмір мен поэзия» атты кітап көрмесі ұйымдастырылды.

Кітап көрмесін ұйымдастырудағы  мақсатымыз  ақынның   өмірін, шығармашылығын насихаттай отырып,  жас ұрпақты еліне, жеріне деген  сүйіспеншілікке тәрбиелеу болған. Әбділда Тәжібаев (1909-1998) — ақын және драматург, филология  ғылымдарының докторы, профессор, Қазақстанның халық  жазушысы.   Ол 1909 жылы Қызылорда (Ақмешіт) қаласында дүниеге келді.  Қызылордадағы жетім балалар интернатында тәрбиеленген. Шымкент қаласындағы жетіжылдық мектепті оқып бітірген. С.М.Киров атындағы Қазақ Мемлекеттік Университетті (қазіргі уақытта Әл-Фараби атындағы Қазақ Ұлттық Университет), Мәскеудегі М.Горький атындағы әдебиет институты жанындағы Жоғары әдеби курсты бітірген.  Еңбек жолын 1926-1928 жж. «Еңбекші қазақ» газетінде пошта-газет тасушысы болып бастаған, кейін корректор болып жұмыс атқарды. 1932-1934 жж. Қарсақбайдағы «Қызыл кеші », «Лениншіл жас» (қазіргі «Жас Алаш») газеттерінде редактордың орынбасары, 1934-39 жж. Қазақстан Жазушылар одағы басқармасының хатшысы, 1939-1943 жж. Қазақстан Жазушылар одағының төрағасы, 1945-1948 жж Қазақ ССР ҒА Тіл және әдебиет институтында бөлім меңгерушісі қызметтерін атқарған. 1958-1960жж. «Қазақ әдебиеті» газетінің жауапты редакторы, 1960-1984 жж. Қазақстан Жазушылар одағы басқармасының хатшысы, Қазақ ССР ҒА әдебиет және өнер институтында аға ғылыми қызметкер, театр өнері бөлімінің меңгерушісі қызметтерін атқарған.

Әбділда Тәжібаев 1927  жылдан бастап жаза бастады. Ең алғаш өлеңдері 1927 жылы «Жұмысшы» газетінде, кейін 1933 ж. «Жаңа ырғақ» атты жинақ болып шықты. «Оркестр», «Құтқару», «Екі жиған», «Абыл», «Шын жүректен», «Сүйген жүрек», «Таныс дауыстар» атты поэмалары мен өлеңдері жарық көрді.

Ағымдағы жылы  ақынның туылғанына 110 жыл  толуына   орай  ұйымдастырылған «Өмір мен поэзия»  атты кітап  көрмесіне Ә. Тәжібаевтың «Аралдар» атты  өлеңдер  мен  дастандары,  Алматы:  Раритет, 2005.  -264 бет. – «Алтын қор» кітапханасы,  Ә. Тәжібаев Шығармалар:  5 томдық.  Алматы: «Жазушы»,  1979.- Т.  Өлеңдер мен  поэмалар, -680 бет.,  Ә Тәжібаев « Құрдастар». Өлеңдер, поэмалар. Алматы,  «Жалын», 1977. 144 бет.,  Ә. Тәжібаев «Көне  қоңырау». Өлеңдер,  Алматы. «Жазушы», 1973 . 244 бет. ,  баспасөз беттерінде  жарияланған  ақынның  өмірбаяны, шығармашылығы  турасында ақпараттар   қойылды.

Кітап көрмесі аптаның   соңына дейін жұмыс жасайды. Кітапханаға келушілер, оқырмандар, қонақтар мен түрлі іс-шараға қатысушылар осы көрмені тамашалай алады.

Жеке қызмет  көрсету  бөлімі