News & Events
«Ашық есік» күндері ЕСЕБІ
2026 жылғы 29–30 қазан күндері «Зағип және нашар көретін азаматтарға арналған республикалық кітапхана» РММ-де дәстүрлі «Ашық есік» күндері өткізілді.
Іс-шараның негізгі мақсаты – кітапхана қызметін көпшілікке таныстыру, зағип және нашар көретін азаматтарға арналған ақпараттық ресурстар мен арнайы қызмет түрлері туралы түсінік қалыптастыру, жаңа оқырмандарды кітапханаға тарту, сондай-ақ инклюзивті мәдени орта қалыптастыруға ықпал ету.
Екі күндік іс-шараның басты нәтижесі – барлығы 274 адамның қатысуы. Оның ішінде 29 қазанда 190 адам, 30 қазанда 84 адам кітапханаға келді. Бұл көрсеткіш кітапхана қызметіне деген қоғамдық қызығушылықтың жоғары екенін және ақпараттық-түсіндіру жұмыстарының нәтижелі жүргізілгенін көрсетті.
Қонақтар қатарында жоғары оқу орындары мен колледждердің студенттері, оқытушылары, кітапханашылар, мәдениет саласының өкілдері, білім беру ұйымдарының қызметкерлері және кітапхана жұмысына қызығушылық танытқан азаматтар болды.
Атап айтқанда, іс-шараға әл-Фараби атындағы Қазақ ұлттық университетінің, Абай атындағы Қазақ ұлттық педагогикалық университетінің, Қазақ ұлттық қыздар педагогикалық университетінің, Алматы технологиялық университетінің, Қазақ спорт және туризм академиясының, Азаматтық авиация академиясының, Нұр-Мүбарак Египет ислам мәдениеті университетінің, Satbayev University және Қазақстан-Британ техникалық университетінің (ҚБТУ) өкілдері қатысты.
Сонымен қатар Есік қаласындағы №1 мектеп-интернаттың өкілдері, Алматы өнер музейінің, Алматы орталықтандырылған кітапхана жүйесінің, Республикалық ғылыми-техникалық кітапхананың, PrintMedia технологиялар колледжінің, Жоғары медициналық колледждің студенттері мен қызметкерлері, сондай-ақ бірқатар жоғары оқу орындарының кітапханашылары келді.
Іс-шара барысында келушілерге зағип және нашар көретін оқырмандарға арналған кітапхана қызметтері, ақпараттық ресурстар және арнайы кітаптарды әзірлеу үдерістері таныстырылды.
Келушілер назарына «Ерекше жандарға ерекше кітаптар» атты кітап көрмесі ұсынылды. Қонақтар жайпақ баспа мәтіндерін Брайль қарпіне аудару, аудиокітаптарды редакциялау және басып шығару жұмыстарымен танысты.
Кітапхана ісін дамыту, библиография және тифлология бөлімдерінің қызметкерлері оңалту кабинетінің жұмысын таныстырып, «Саусақ ұшындағы әлем» атты интерактивті танымдық ойын өткізді. Бұл іс-шара келушілерге тактильді ақпараттың маңызын түсінуге және зағип адамдардың ақпаратты қабылдау ерекшеліктерін тәжірибе жүзінде тануға мүмкіндік берді.
Сонымен қатар 1986 жылғы Желтоқсан көтерілісінің 40 жылдығына орай Qazaqstan телеарнасы ұсынған «Желтоқсан жаңғырығы» деректі фильмі тифлокомментарий арқылы көрсетілді.
Кітапхана мамандарына арналған «Библиографиялық көрсеткіш: құрастыру кезеңдері және тәжірибелік үлгі» тақырыбында әдістемелік практикум ұйымдастырылды.
Екі күн бойы келушілер кітапхана қорымен, Брайль қарпімен басылған әдебиеттермен, аудиокітаптармен, тактильді материалдармен және заманауи тифлотехникалық құралдармен танысуға мүмкіндік алды. Әсіресе келушілердің Брайль қарпімен өз есімдерін жазып көруге, тактильді құралдарды тәжірибе жүзінде байқап көруге деген қызығушылығы ерекше байқалды.
«Ашық есік» күндері кітапхана қызметінің ерекшелігін кеңінен насихаттап қана қоймай, білім беру ұйымдары, жоғары оқу орындары, мәдени мекемелер мен кітапхана мамандары арасындағы кәсіби байланысты нығайтуға ықпал етті.
Қорытындылай келе, 29–30 қазан күндері ұйымдастырылған «Ашық есік» күндері өз мақсатына жетті. Екі күн ішінде 274 адамның қатысуы – кітапхана қызметіне деген қызығушылықтың айқын көрсеткіші. Аталған іс-шара инклюзивті кітапхана мәдениетін қалыптастыруға, ерекше қажеттіліктері бар азаматтарға арналған ақпараттық ресурстардың қолжетімділігін насихаттауға және қоғамның инклюзия туралы түсінігін кеңейтуге бағытталған маңызды бастама болды.















